გორის მუნიციპალიტეტში სოფლის მხარდაჭერის პროგრამის ფარგლებში დასაფინანსებელი პროექტების შერჩევის მიზნით, მოსახლეობასთან შეხვედრები დაიწყო.

გორის მერმა ვლადიმერ ხინჩეგაშვილმა, საკრებულოს წევრებთან ერთად, მოსახლეობასთან პირველი შეხვედრები გამართა და აღნიშნული პროგრამით გათვალისწინებული პროექტების გარდა, მოსახლეობის სხვა საჭიროებებსაც გაეცნო.

ადგილობრივი თვითმმართველობის ინფორმაციით, სოფლის მხარდაჭერის პროგრამის ფარგლებში დასაფინანსებელ პროექტებს სოფლის მოსახლეობა შეხვედრებზე ხმათა უმრავლესობით თავად შეარჩევს. შეხვედრები კი წინასწარ შედგენილი გრაფიკით უკვე დაიწყო.

„ყველა სოფელში 10 ათასიდან 20 ათას ლარამდე ღირებულების მცირე ინფრასტრუქტურული პროექტები დაფინანსდება.

პროგრამის ფარგლებში, 2024 წელს გორის მუნიციპალიტეტისთვის 1 596 000 ლარია გამოყოფილი. გორის მუნიციპალიტეტში სოფლის მხარდაჭერის პროგრამის ფარგლებში შეხვედრები 13 თებერვლის ჩათვლით გაგრძელდება და მუნიციპალიტეტის 112 დასახლებულ პუნქტში გაიმართება“, - აცხადებენ გორის მერიაში.