გორის მუნიციპალიტეტის მერიაში მოქმედი სოციალური პროგრამის ფარგლებში, სოციალურად დაუცველი, მარტოხელა სტატუსის მქონე მშობლები, ერთჯერად ფინანსურ დახმარებას მიიღებენ.

ადგილობრივი თვითმმართველობის ინფორმაციით, პირებს, რომლებსაც მიღებული აქვთ 0-დან - 150 000-მდე სოციალური ქულა, გორის მუნიციპალიტეტის მერია ერთჯერადად შემწეობის სახით 500 ლარი გადასცემს.

შეგახსენებთ, 2023 წელს 0-დან – 70 000-მდე სოციალური ქულის მფლობელი მარტოხელა მშობლები ადგილობრივი თვითმმართველობისგან შემწეობის სახით 500 ლარს იღებდნენ, ის ბენეფიციარები კი, ვისაც 70 000-დან 100 000-მდე სარეიტინგო ქულა აქვთ მინიჭებული - 300 ლარს.

200 ლარის ოდენობით ფულად დახმარებას იღებდნენ 100 000-დან 150 000-ის ჩათვლით სარეიტინგო ქულის მქონე მოქალაქეებიც.

ზემოხსენებული დახმარებებით სარგებლობა შეუძლიათ მხოლოდ გორის მუნიციპალიტეტის ტერიტორიაზე რეგისტრირებულ პირებს. მოქალაქეებმა თანხის მისაღებად წერილობით უნდა მიმართონ გორის მერიას.