გორის მუნიციპალიტეტში სოფლის მხარდაჭერის პროგრამის ფარგლებში დასაფინანსებელი პროექტების შერჩევა იწყება.

ადგილობრივი თვითმმართველობის ინფორმაციით, პროექტებს სოფლის მოსახლეობა შეხვედრებზე ხმათა უმრავლესობით შეარჩევს. შეხვედრები წინასწარ შედგენილი გრაფიკით 22 იანვრიდან დაიწყება.

„პროგრამის ფარგლებში თითოეულ სოფელში 10 ათასიდან 20 ათას ლარამდე ღირებულების მცირე ინფრასტრუქტურული პროექტები დაფინანსდება.

სოფლის მხარდაჭერის პროგრამასთან დაკავშირებულ საკითხებს და საპროექტო წინადადებების მიღების პროცესს კოორდინაციას გორის მუნიციპალიტეტის მერის ბრძანებით განსაზღვრული თანამდებობის პირები გაუწევენ.

პროგრამა საქართველოს რეგიონებში განსახორციელებელი პროექტების ფონდიდან ფინანსდება და გორის მუნიციპალიტეტისთვის 1 596 000 ლარია გამოყოფილი“, - აცხადებენ გორის მერიაში.

„სოფლის მხარდაჭერის პროგრამა 2024“-ის ფარგლებში განსახორციელებელი პროექტების შერჩევის პროცესი თებერვალში დასრულდება.

შეხვედრები მუნიციპალიტეტის 112 დასახლებულ პუნქტში გაიმართება.